Калі няма адзінства ў нас

Калі няма адзінства ў нас

Між палкім сэрцам і душою –

Жыццё атручаным напоем,

На жаль, становіцца падчас.

Калі няма адзінства ў нас

Шляхоў ад мары да здзяйснення –

Дарэмнасцю пустых імкненняў

Абрыне лёс зямны адказ.

Як адпаведнасці няма

Паміж размоваю і справай –

Глухім раздзелам неўзабаве

Праляжа чужасці сцяна.

А хто ў жыццёвай барацьбе

Нябыту час адвесці зможа? –

Ні на хвіліну, дай нам Божа,

Не раз’ядноўвацца ў сабе.