Дай Божа нам

                                         Сяргею Украінку

Дай Божа нам

Ачысціцца ад фарбаў,

Якімі нас расквеціў гэты век,

Каб не шукаць ні знатнасці, ні скарбаў,

А звацца проста – добры чалавек.

Ляцець па часе птушкаю свабоды,

Адзінай мовай з небам гаварыць,

Каб хараство бясконцае пяшчоты

Душы сусвету для сябе адкрыць.

Любіць жыццё – звычайнае, зямное,

Каб, сэрцам аб’яднаўшыся з зарой,

Купацца ў перадранішнім спакоі,

У шчасце занырнуўшы з галавой.

І  дзень, адмыты гэтаю зарою,

Надзеяй прамяністай асвяціць,

Каб свет убачыць, створаным Табою.

Не верыць, не баяцца, не прасіць.

Дай Божа нам

Ачысціцца ад фарбаў,

Якімі нас расквеціў гэты век

І не шукаць ні знатнасці, ні скарбаў,

А звацца проста – добры чалавек.